Thet Paing Writes

ကဗျာ အတွဲ (၂) လင်္ကာပိုဒ် (၁) မှ (၃၄) ညီလာခံကျင်းပခန်း နှင်းဆီရောင် တောက်ပသော လက်အစုံရှိသည့် မိုးသောက်နတ်သမီး အီးယို့စ် ပေါ်ထွက်လာသည်နှင့်တပြိုင်နက် တယ်လစ်မက္ကပ်စ်သည် အိပ်ရာထက်မှထကာ မိမိကိုယ်ကို ၀တ်စုံပြည့် ၀တ်ဆင်လိုက်သည်။ သူသည် ချွန်ထက်သောဓါးရှည်ကို ပုခုံးတွင်လွယ်၍ ဖြူဖျော့သော ခြေထောက်တွင်လည်း ကြိုးသိုင်းဖိနပ်စီးကာ အဆောင်ထဲမှ နတ်ဘုရားတစ်ပါးကဲ့သို့ တင့်တယ်သော အဆင်းဖြင့် ထွက်လာခဲ့တော့၏။ ထို့နောက် သူသည် ကြည်လင်သောအသံရှိသည့် သံတော်ဆင့်တို့အား အာခီယန်အမျိုးကောင်းသားများကို ညီလာခံတက်စေရန် ကြေညာခိုင်းလေသည်။ သံတော်ဆင့်တို့ကလည်း ကျယ်လောင်သောအသံတို့ဖြင့် နန်းတော်အတွင်း လှည့်လည်ကြေညာပြီး ခဏတွင်းချင်းမှာပင် အာခီယန်သားတို့ ခန်းမအတွင်း၌ စုဝေးလာကြကုန်၏။ ထိုသူများအားလုံး စုံညီသောအခါ တယ်လစ်မက္ကပ်စ်သည် လက်တွင် ကြေးလှံတံကို ကိုင်ဆောင်၍ အမဲလိုက်ခွေးကြီး နှစ်ကောင်ခြံရံလျက် ခန်းမဆောင်တွင်းသို့ လှမ်း၀င်လာလေလျှင် အက်သီနာ နတ်သမီး၏ တန်ခိုးကြောင့် ထွန်းလင်းတောက်ပနေသော သူ့အား ကြင်ယာလောင်းလျာများက အံ့အားသင့်စွာ ငေးကြည့်ကြလေသည်။ မျိုးရိုးမြင့်သူများမှ ပေါက်ဖွားလာသော အစ်သက္ကပြည်သား လူကြီးသူမများကလည်း တယ်လစ်မက...