လင်္ကာပိုဒ် (၉၆) မှ (၁၅၅)

အက်သီနာ မှ တယ်လစ်မက္ကပ်စ်ဆီသို့ ရောက်ရှိလာခန်း

 

ထိုသို့ဆိုပြီးသောအခါ နတ်သမီးသည် အရောင်အ၀ါ ထွန်းလင်းတောက်ပသော ရွှေ‌ကြိုးသိုင်းဖိနပ်ကို စီးကာ ကျယ်ပြန့်လှသော မြေပြင်ကို လေ၏အလျင်ဖြင့် စီးနင်းလျက် အစ်သက္ကတိုင်းပြည်သို့ သက်ဆင်းဖို့ရာ ပြင်ဆင်ပေတော့သည်။ အက်သီနာသည် သူ၏အမျက်ကိုရှတော်မူသော လူသားများနှင့် သူရဲကောင်းများကို ချေမှုန်းရာတွင် အသုံးပြုသော ချွန်ထက်သည့် ကြေးသတ္တုချွန်းတပ်ထားသည့် ကြီးမားကြံ့ခိုင်ကာ သန်မာလှသော လှံတံကိုလည်း တပါတည်း ဆောင်ယူလာလေ၏။ ထို့နောက် သူသည် အိုလံပတ်စ် တောင်ထိပ်မှ အစ်သက္ကပြည်သို့ ပျံသန်းလာကာ အိုဒစ်စီးယပ်စ်၏ အိမ်တော် တံခါး၀ ဖိနပ်ချွတ်အဆင့်တွင် ကြေးလှံတံကို လက်ကကိုင်စွဲလျက် မိမိကိုယ်ကို လည်း တာဖီယန် (၂၉) နွယ်၀င်တို့၏ ခေါင်းဆောင် မန်းတီးစ် (၃၀) အဖြစ်သို့ ဖန်ဆင်းကာ မတ်တပ်ရပ်နေလေသည်။ အိမ်တော်တံခါး၀တွင် ကြင်ယာလောင်းလျာများ များသည် ၎င်းတို့သတ်ဖြတ်ထားသော အိုဒစ်စီးယပ်စ် အိမ်တော်ပိုင် နွား၏ကိုယ်မှ သားရေကို အခင်းလုပ်ကာ ထိုင်လျက် အခြားသူများနှင့်အတူ မိုက်ရိုင်းရမ်းကားစွာ ပျော်ပါး ဆော့ကစားလျက်ရှိနေ၏။ သူတို့၏ ခြွေရံသင်းပင်းများနှင့် အလုပ်အကျွေးများကလည်း ရေနှင့် ဝိုင်ကို ရောစပ်ခြင်း၊ စားပွဲခုံများအား ရေမြှုပ်ဖတ်ဖြင့် တိုက်ပွတ်ဆေးကြောခြင်းနှင့် များပြားလှစွာသော အသားဟင်းလျာ စားကောင်းသောက်ဖွယ်များကို တည်ခင်းခြင်းတို့ဖြင့် အလုပ်ရှုပ်နေကြလေသည်။

 

ကြင်ယာလောင်းလျာများအကြားတွင် ညှိုးငယ်စွာ ထိုင်လျက် မြင့်မြတ်သော ဖခင်သာ ခရီးမှ ပြန်ရောက်လာပါက ဤကဲ့သို့သော ကျေးဇူးမသိတတ်လှသည့် ကြင်ယာလောင်းလျာများအား ချက်ချင်းမောင်းထုတ်ပစ်ကာ အစ်သက္ကတိုင်းပြည်ကို ပြန်လည်အုပ်စိုးနိုင်မည်ဖြစ်ပေသည်ဟု တွေးတောနေသော နတ်ဘုရားတစ်ပါးကဲ့သို့ နုနယ်ပျိုမြစ်သောအဆင်းရှိသည့် မင်းသားငယ် တယ်လစ်မက္ကပ်စ် (၃၁)က အိမ်တံခါး၀ရှိ သူစိမ်းကို ပထမဆုံး တွေ့မြင်လေသည်။ တယ်လစ်မက္ကပ်စ်က သူစိမ်းယောင်ဆောင်ထားသော အက်သီနာ နတ်သမီးအား မြင်လေလျှင် ခရီးဝေးမှလာရသော အာဂန္တုအား ဤမျှပင် အချိန်ကုန်လွန်အောင် စောင့်ခိုင်းရလေသလားဟု တွေးထင်ကာ အားနာခြင်းကြီးစွာဖြင့် တံခါးဆီသို့ လျှောက်သွား၍ ကိုယ်တိုင်ပင် ခရီးဦးကြိုပြု၏။ သူက နတ်သမီးအပါးကို ကပ်၍ လက်ကို ဆွဲကိုင်ကာ နှုတ်ဆက်ပြီး ကြေးလှံတံကိုလည်း ဆောင်ယူကာ စကားဆိုလေသည်။

 

" ကြိုဆိုပါတယ် ဧည့်သည်ကြီးခင်ဗျား။ ဤနေရာက သင့်ကို ပျူငှာစွာ ကြိုဆိုပါတယ်။ စားကောင်းသောက်ဖွယ်များ သုံးဆောင်ပြီးတဲ့အခါ ဘယ်အရပ်မှ သည်ကို လာခဲ့ရသလဲဆိုတာ ပြောပြပါဦး ခင်ဗျာ"

 

ထို့နောက် အပျိုစင် နတ်သမီး အက်သီနာ လည်း တယ်လစ်မက္ကပ်စ်၏နောက်မှ လိုက်သွားလေသည်။ အိမ်တော်အတွင်းရှိ ကျယ်ပြန့်သော နေရာလွတ်သို့ ရောက်သောအခါ တယ်လစ်မက္ကပ်စ်က ကြေးလှံတံကို ဖခင် အိုဒစ်စီးယပ်စ်၏ လှံတံများထားရာ အချောပွတ်ထားသည့် တိုင်လုံးတန်း တွင်မှီလျက် ဖခင်၏လှံတံများနှင့်အတူ ထောင်ထား၏။ သူသည် အက်သီနာ အား လီနင် စ စားပွဲခင်းထပ်ခင်း၍ လှပသေသပ်စွာ ထုထွင်းထားသည့် စားပွဲဆီသို့ ဆောင်ကျဉ်းပြီးလျှင် ထိုင်နားဖို့ရာ ခုံပုကလေးလည်း ယူလာပေး၏။ ထို့နောက် သူက အဆင်တန်ဆာ ဆင်ယင်ကာ ထုထွင်းထားသော ခုံပုတစ်လုံးကိုယူကာ သူစိမ်းအားစားကောင်းသောက်ဖွယ်များကို မညီးမညူ‌ဘဲ စားရ‌လေအောင် ဆူညံလျက်ရှိသော ကြင်ယာလောင်းလျာများနှင့်ဝေးရာတွင် ထိုင်စေလျက် အိမ်‌တော်နှင့် ကင်းကွာနေသော ဖခင်ဖြစ်သူ၏ သတင်းကို မေးဖို့ရာ ကြံလေသည်။ ထို့နောက် အစားအသောက် မဧည့်ခံခင်တွင် အစေခံမတစ်ဦးက ရေကို သန့်ရှင်းလှပ‌သော ရွှေကရားဖြင့်ဆောင်ယူလာကာ ငွေခွက်ထဲသို့ လောင်းထည့်ပြီးလျှင် သူစိမ်းဧည့်သည်၏ လက်အစုံကို သန့်စင်စေသည်။ အိမ်တော်ထိန်းကလည်း တိတ်ဆိတ်တည်ငြိမ်စွာဖြင့် ပေါင်မုန့်၊ အချိုမုန့်မျိုးစုံတို့ကို အက်သီနာ နတ်သမီးအတွက် ခင်းကျင်းပေး၏။ ထို့အပြင် အသားဟင်းပြင်ဆင်သူက နတ်သမီးအတွက် အသားဟင်းလျာမျိုးစုံကို ရွှေခွက်များနှင့်အတူ တည်ခင်းပြီး စားပွဲထိုးတစ်ဦးကလည်း အနီးအနားတွင် ဝိုင်အရက်ငှဲ့ပေးကာ ခစားလျက်ရှိနေတော့သည်။

 

ရိုင်းစိုင်းလှသော ကြင်ယာလောင်းလျာတို့ကလည်း စားပွဲခုံများတွင် ၀င်ထိုင်ကာ ခုံအသီးသီးတွင် နေရာယူကြလေသည်။ လူရွယ်များက ၎င်းတို့၏ လက်များကို ဆေးကြောသန့်စင်ပေးကာ အစေခံများကမူ ပေါင်မုန့်များဖြင့် ပြည့်နှက်လျက်ရှိသော ခြင်းတောင်းများအား ၎င်းတို့ဘေးတွင် တည်ခင်း၍ ခြွေရံများကလည်း ဝိုင်ခွက်များကို အသီးသီး ငှဲ့ပေးကြကုန်၏။ ထို့နောက် ကြင်ယာလောင်းလျာတို့သည် ၎င်းတို့ရှေ့တွင် ခင်းကျင်းထားသော စားကောင်းသောက်ဖွယ်တို့အား အငမ်းအရ စားသောက်ကြလေသည်။ ထိုသူတို့သည် ဗိုက်ပြည့်သောအခါ စားသောက်ပွဲတိုင်းတွင် မပါမဖြစ်သော သီဆို ကခုန်ခြင်းများကို စိတ်ရောက်ကြပြန်၏။ ၎င်းတို့၏ တောက်တိုမည်ရ ရှေ့ပြေးတစ်ယောက်က ဖီးမီးယပ်စ် (၃၂)၏ လက်ထဲသို့ စောင်းကိုထည့်လိုက်သောအခါ သူက သာယာနာပျော်ဖွယ်ကောင်းသော သီချင်းတစ်မျိုးကို စတင် တီးခတ်လေတော့သည်။

 

လင်္ကာပိုဒ် (၁၅၆) မှ (၂၁၂)

အက်သီနာ နတ်သမီးမှ မိမိကိုယ်ကို မန်းတီးစ်ဟု မိတ်ဆက်စကားဆိုခန်း

 

ထိုအခါမှ တယ်လစ်မက္ကပ်စ်သည် ကြင်ယာလောင်းလျာများ မကြားရလေအောင် အက်သီနာ အပါးသို့ ခေါင်းငဲ့၍ စကားဆို၏။

 

" မိတ်ဆွေကြီးခင်ဗျာ... ကျွန်ုပ်ပြောဆိုသော ဤစကားကို စိတ်မခုပါနှင့်။ ဒီလူတွေဟာ ပင်လယ်ပြင်မှာ အရိုးတခြား အသားတခြားဖြစ်နေမလား ဒါမှမဟုတ် ဝေးကွာလှတဲ့ ကမ်းစပ်တစ်နေရာမှာ မိုးဒဏ်လေ‌ဒဏ်ဖြင့် သေဆုံးနေသလား မသိရရှာတဲ့ ကျွန်ုပ်၏ဖခင်ရဲ့ စည်းစိမ်တွေကို ပြည်လည်ဖြည့်တင်းပေးဖို့ရာ စိတ်အလျဉ်းမရှိဘဲ သုံးဖြုန်းစားသောက်ပြီး သီဆို ကခုန်ကာ ပျော်မြူးနေကြသူများသာ ဖြစ်ပါတယ်။ တကယ်လို့ ဖခင်သာ ယခုအချိန် အစ်သက္ကတွင် ရှိနေပါက ထိုသို့သော ကျေးဇူးမသိတတ်သူများအဖို့ ရွှေ၊ငွေ၊ အထည်အလိပ်များနှင့်စည်းစိမ်ခံစားဖို့ဝေးစွ၊ ဖနောင့်နှင့်တင်ပါး တသားတည်းကျအောင် ပြေးကြရမည်မှာ အမှန်ပါပဲ။ သို့သော် ဖခင်ဟာ ကံကြမ္မာဆိုးလှတာကြောင့် ဤလောကတွင် ရှိနိုင်တော့မည် မဟုတ်ပါ။ လူသားတစ်ဦးကပင် သင့်ဖခင် တစ်နေ့ပြန်လာလိမ့်ဦးမည်ဟု စကားဆိုလာလျှင် ကျွန်ုပ် ယုံကြည်နိုင်တော့မည် မဟုတ်။ သို့ပေမယ့် မိတ်ဆွေဟာ မည်သို့သောအရပ်မှလာပြီး ဘယ်သူဘယ်ဝါဖြစ်တယ်ဆိုတာကို ကျွန်ုပ်အား မခြွင်းမချန် မှန်မှန်ကန်ကန် ပြောပြပါဦး။ သင် ဘယ်မြို့ကလာပြီး သင့်မိဘတွေဟာ မည်သို့သောသူတွေ ဖြစ်ကြပါသလဲ မိတ်ဆွေ။ သင် ဤအရပ်သို့ ခြေလျင်ဖြင့် ရောက်လာမည်မဟုတ်ဟု ကျွန်ုပ် ယုံကြည်ပါတယ်။ ထို့ကြောင့် မည်ကဲ့သို့သော လှေသားများပါ၀င်သည့် ရေယာဉ်ကို စီးနင်းကာ အစ်သက္ကပြည်သို့ ရောက်လာပါသလဲ။ ပြီးတော့ ဤခရီးဟာ သင့်အတွက် အစ်သက္ကပြည်သို့ ပထမဆုံး ခရီးရွက်လွှင့်လာခြင်း ဖြစ်ပါ၏လော။ သို့တည်းမဟုတ် သင်ဟာ ကျွန်ုပ်ဖခင်ရဲ့ မိတ်ဆွေရင်းပင် ဖြစ်ပါ၏လော။ ကျွန်ုပ်၏ စံအိမ်တော်သို့ ကြွရောက်လာကြ‌ကုန်သော ဧည့်သည် အာဂန္တုအပေါင်းတို့ဟာ ဖခင်ကဲ့သို့ပင် ပင်လယ်တခွင် ရွက်လွှင့်လာကြသော ခရီးသည်များ ဖြစ်ကြပါတယ်"

 

ထိုအခါ ကြည်လင်သန့်ရှင်းသော မျက်လုံးအစုံရှိသည့် အက်သီနာ နတ်သမီးက တယ်လစ်မက္ကပ်စ်အား ပြန်၍ဖြေကြားလေသည်။

 

" ကောင်းပါပြီ အဆွေ။ သင့်ကို ကျုပ် မခြွင်းမချန်ပြောပြပါ့မည်။ ကျုပ်ဟာ ပင်လယ်ပျော်လူမျိုးစု တာဖီယန်နွယ်၀င်တို့ရဲ့ အရှင် ဉာဏ်ပညာနှင့်ပြည့်စုံလှတဲ့ အန်ခီယာလက်စ် (၃၃)၏ သား မန်းတီးစ် ဖြစ်ပါတယ်။ ယခုအခါတွင် သင့်မျက်မြင်ဖြစ်သည့်အတိုင်း ကျုပ်တို့ရဲ့ ရေယာဉ်နှင့် သင်္ဘောသားများဟာ အရောင်အဝါ တောက်ပြောင်လှတဲ့ သံထည်များကို တင်ဆောင်ပြီး ဝိုင်ရည်မျှ အရောင်နက်လှသော ပင်လယ်ပြင်ကိုဖြတ်၍ တမ္မိ့စ် (၃၄) ပြည်မှ ကြေးထည်များဖြင့် လဲလှယ်ရန်သွားရောက်စဉ် အစ်သက္ကပြည်အား လမ်းကြုံ၀င်လာကြခြင်းသာ ဖြစ်ပေတယ်။ ကျုပ်တို့ရဲ့ သင်္ဘောဟာ အစ်သက္ကပြည်ရဲ့ အပြင်ဘက် နိုင်ယွန်တောင် (၃၅)အောက်ခြေက ရစ်သရွန်(၃၆) ကမ်းခြေမှာ သောင်ကပ်လျက်ရှိပါတယ်။ ကျုပ်တို့ရဲ့ဖခင်များဟာ မိတ်ဆွေရင်းကြီးများ ဖြစ်ကြသမို့ သင်နှင့် ကျုပ်လည်း မိတ်ဆွေအဖြစ် ဆက်ဆံပေါင်းသင်းကြရအောင်ပါ။ ကျုပ်စကားအား သင် မယုံကြည်နိုင်ပါက နန်းတော်ကိုစွန့်၍ တောင်ကြားဒေသမှာ စပျစ်ခင်းကို ပင်ပင်ပန်းပန်း စိုက်ပျိုးပြီး စားသောက်ဖွယ် တည်ခင်းပေးဖို့ရာ အစေခံမိန်းမအိုတစ်ဦးနှင့်သာ ဆင်းရဲ ခြိုးခြံစွာနေလျက်ရှိတဲ့ သူရဲကောင်းအိုကြီး လေအာတီးစ် (၃၇)ကို သက်သေအဖြစ် စုံစမ်းမေးမြန်းပါချေ။ ကျုပ် ဤအရပ်သို့ရောက်လာရခြင်းဟာ အိုဒစ်စီးယပ်စ်တစ်ယောက် သူ့ရဲ့ တိုင်းပြည်ဆီ ပြန်ရောက်နေပြီဆိုတဲ့ သတင်းကြောင့် ရယ်ပါ။ အိုဒစ်စီးယပ်စ်ရဲ့ ဝိဉာဉ်ဟာ ဤကမ္ဘာမြေပေါ်မှာ တည်ရှိနေ‌သေးပေမယ့် အစ်သက္ကတိုင်းသို့ မရောက်ရှိရသေးတဲ့ အကြောင်းအရင်းဟာ နတ်ဘုရားတို့၏ စနက်ကြောင့်သာ ဖြစ်ရပါမယ်။ အိုဒစ်စီးယပ်စ်ကို ပင်လယ်ပြင်တစ်နေရာရှိ ရိုင်းစိုင်းလှသော မျိုးနွယ်စုတစ်ခုက ဖမ်းဆီးထိန်းသိမ်းထားတယ်လို့ ကျုပ် ယုံကြည်ပါတယ်။ ကျုပ်ဟာ အကြားအမြင်ရရှိသူ သို့မဟုတ် နမိတ်ဖတ်ကြားသူ မဟုတ်သော်ငြားလည်း ကျုပ်စိတ်အာရုံမှာ ပေါ်ပေါက်လာတဲ့ သေခြင်းအလျဉ်းကင်းမဲ့သော နတ်ဘုရားတို့ရဲ့ သတင်းစကားကို သင့်အား ပြောကြားပါဦးမည်။ သင့်ဖခင်ကို ချုပ်နှောင်ထားတဲ့ သံခြေကျင်းတွေဟာ သူ့ကို မွေးရပ်ဌာနေဆီပြန်လာဖို့ ထပ်မံ၍ တားဆီးနိုင်မည် မဟုတ်တော့ပါ။ သူဟာ ဉာဏ်ပညာကြီးမားသူဖြစ်တဲ့အလျောက် အစ်သက္ကတိုင်းပြည်ဆီသို့ ကျိန်းသေပေါက် ပြန်ရောက်လာပါလိမ့်မယ် အဆွေ တယ်လစ်မက္ကပ်စ်။ သို့ပေမယ့် အရပ်အမောင်း ရှည်လျားလှတဲ့ သင်ဟာ အမှန်တကယ်ပင် အိုဒစ်စီးယပ်စ်၏ သားမောင် ဧကန် ဖြစ်ပါ၏လော။ သင့်ရဲ့ ဦးခေါင်းနှင့် မျက်လုံးအစုံတို့ဟာ အားဂစ်သားတို့နှင့်အတူ ထရွိုင်မြို့ဆီ ရွက်လွှင့်မသွားခင် ကျုပ်တွေ့ဖူးတဲ့ သင့်ဖခင်နှင့် အံ့ဩစရာကောင်းလောက်အောင် တူညီလှပါ‌ ပေတယ်။ ထိုနေ့ကစပြီး ကျုပ်လည်း သူရဲကောင်း အိုဒစ်စီးယပ်စ်နှင့် မတွေ့ရသည်မှာ ယခုအချိန်အထိပါပဲ"

လင်္ကာပိုဒ် (၂၁၃) မှ (၂၅၁)

တယ်လစ်မက္ကပ်စ်မှ ကြင်ယာလောင်းလျာများအား အပြစ်ဆိုခန်း

 

ဉာဏ်အမြော်အမြင်ရှိလှ‌သော တယ်လစ်မက္ကပ်စ်မှ ဤသို့ဆိုလေ၏။

" ကျွန်ုပ် သင့်ကို ရိုးသားစွာ ၀န်ခံပါ့မည်။ ကျွန်ုပ်ဟာ ဖခင်ရဲ့ သားဖြစ်ပါတယ်လို့ မိခင်က ပြောဖူးပေသော်ငြားလည်း ငယ်စဉ်တောင်ကျေး ကလေးဘ၀ကတည်းကပင် ဖခင်ကို တစ်ခါမျှ မမြင်ဖူးတာမို့ ကျွန်ုပ်လည်း တပ်အပ် မပြောတတ်ပါ မိတ်ဆွေ။ ကျွန်ုပ်ရဲ့ ဖခင်ဟာ အများနည်းတူပင် အသက်အရွယ်ကြီးရင့်သည်အထိ ကိုယ်ပိုင်စံအိမ်တော်မှာ မိသားစုနှင့်အတူ နေထိုင်တတ်သူသာ ဖြစ်ခဲ့လျှင် အင်မတန် ကောင်းလိုက်စမ်းပါဘိ။ သင်ပြောသလို ကျုပ်ဟာ အိုဒစ်စီးယပ်စ်ရဲ့ သားမောင် မှန်တယ် ဆိုရင်ဖြင့် ကျုပ်ဟာ ကံဆိုးလှတဲ့ လူသားတစ်ဦးရဲ့ မျိုးဆက်လို့သာ ဆိုရပါမယ် အ‌ဆွေ"

ထိုစကားကို ကြားလေသော် ကြည်လင်သန့်ရှင်းသည့် အကြည့်ဖြင့် အက်သီနာက ပြန်လည်မေးမြန်းလေသည်။

 

" သို့ပေမယ့် သင်ဟာ ဖီနယ်လိုပီရဲ့ သားတော်လည်း ဖြစ်ပေသမို့ နတ်ဘုရားများက ပစ်မထားပါဘူးကွယ်။ ယခုတော့ဖြင့် ကျုပ်ကို ဤ စားသောက်ပွဲကြီးအကြောင်း ရှင်းပြစမ်းပါဦး အဆွေ တယ်လစ်မက္ကပ်စ်။ အဘယ်ကြောင့်များ သင့်စံအိမ်တော်မှာ ယခုလို ပွဲတော်ကြီး ကျင်းပနေရပါသလဲ။ ဂုဏ်ပြုပွဲ သို့မဟုတ် လက်ထပ်မင်္ဂလာပွဲများ ကျင်းပနေသလား သိပါရစေ။ ထိုဧည့်သည်တွေဟာ သင့်စံအိမ်တော်ဆီ ကိုယ်ပိုင် စားနပ်ရိက္ခာယူဆောင်လာခြင်းအလျဉ်းမရှိကြပေမယ့်လည်း အင်မတန့်ကို ပိုင်စိုးရမ်းကား ရဲကြပေတယ်။ အသိဉာဏ်နှင့် ပြည်စုံတဲ့ သူသာ ထိုသူတို့ရဲ့ ရှက်ဖွယ် ဖြစ်အင်ကို မြင်လျှင် ပြစ်တင်ပြောဆိုမှာ အမှန်ပါပဲ"

 

ထိုအခါ တယ်လစ်မက္ကပ်စ်ကလည်း

 

" မိတ်ဆွေ...သင်၏အမေးကို ကျွန်ုပ်‌ဖြေကြားပါမည်။ ကျွန်ုပ်ရဲ့ စံအိမ်တော်ဟာ အိုဒစ်စီးယပ်စ် အုပ်ချုပ်စဉ်ကာလတုန်းကဖြင့် ဓနစည်းစိမ် ကြွယ်၀ကာ ဂုဏ်ကျက်သရေထွန်းပြောင်လှသော စံအိမ်နန်းတော်ဖြစ်ခဲ့ပါ၏။ သို့သော် နတ်ဘုရားတို့ဟာ အိုဒစ်စီးယပ်စ်ကို အခြားလူသားများနှင့်မတူ ထူးခြားသောနည်းဖြင့် အမျက်တော်ရှလေသဖြင့် ဤကမ္ဘာမြေပေါ်မှာ မဖွေရှာနိုင်အောင် ကွယ်ဝှက်၍ ထားကြ၏။ အကယ်၍ သူဟာ ထရွိုင်မြို့တော်ကို တိုက်ခိုက်စဉ်ကတည်းက စစ်ဖော်စစ်ဖက်များနှင့်အတူ ကျဆုံးခဲ့ရလျှင် သို့မဟုတ် စစ်ပွဲကြီးပြီးကာမှ အဆွေခင်ပွန်းများလက်တွင် တမလွန်သို့ ကူးပြောင်းသွားသည်ဟု ကြားရလျှင်ပင် ကျွန်ုပ် ကျေနပ်နိုင်ဦးပါမည်။ ထို့သိုဆိုလျှင် အာခီယန်မျိုးနွယ်ခေါင်းဆောင်က သူရဲ‌ကောင်း အိုဒစ်စီးယပ်စ်အတွက် ခန့်ညားသော ဂူသင်္ချိုင်းတည်ဆောက်ကာ သားဖြစ်သူ ကျွန်ုပ်မှာလည်း ဖခင်ဖြစ်သူရဲ့ ရဲ့ဝံ့စွာ အသက်ပေးခဲ့ခြင်းအကြောင်းကို ဂုဏ်ယူစွာကြားရပေဦးမည်။ အကယ်၍ ဟားပီးစ် (၃၈) သတ္တဝါတို့ရဲ့ နှောင့်ယှက်မှုကြောင့် ဖခင် ကျွန်ုပ်တို့ဆီ ပြန်မလာနိုင်ခဲ့ခြင်းဖြစ်လျှင် ကျွန်ုပ် ၀မ်းနည်းမိမှာဖြစ်သော်လည်း ဤမျှ သက်ပြင်းချ၍ စိတ်သောကရောက်ရမည် မဟုတ်ပါ။ နတ်ဘုရားတို့ဟာ ကျွန်ုပ်ကို တမင်ပင် စိတ်အားငယ်ရအောင် ကြံကြလေသလားဟု ထင်မှတ်ရပေ၏။ ဒူလီခီယမ် (၃၉)ပြည်၊ ဆေမီ (၄၀)ပြည်နှင့် တောတောင်ထူထပ်လှသော ဇက်ခင်းသပ်စ် (၄၁)ပြည် စသည့် တိုင်းပြည်ရှိ အမျိုးကောင်းသား အရှင်သခင်တို့သာမက ခြောက်သွေ့ကာ ကျောက်တုံးထူထပ်လှသော အစ်သက္ကမြေမှ သူကောင်းသားအချို့ကပါ ကျုပ်မိခင်ကို လက်ဆက်ရန် လာရောက် တောင်းရမ်းကြကာ ကျုပ်တို့စံအိမ်တော်ရဲ့ ဓနစည်းစိမ်ကို ပွဲတော်တည်ပြီး ဖြုန်းတီးပစ်ရုံမျှမက ကျုပ်ရဲ့ အသက်ခန္ဓာကိုပါ ဖျက်ဆီးဖို့ရန် စိုင်းပြင်းနေကြပေပြီ" ဟုဆို၏။

စာညွှန်း

၂၉။ တာဖီယန် - တာဖော့စ်အနွယ်၀င်များ။

၃၀။ မန်းတီးစ် - တာဖီယန်လူမျိုးများ၏ ဘုရင်၊ အိုဒစ်စီးယပ်စ်၏ မိတ်ဆွေ။

၃၁။ တယ်လစ်မက္ကပ်စ် - အိုဒစ်စီးယပ်စ်နှင့် ဖီနယ်လိုပီတို့၏ သားတော်။

၃၂။ ဖီးမီးယပ်စ် - အစ်သက္ကပြည်ရှိ သီချင်းသည်။

၃၃။ အန်ခီယာလက်စ် - မန်တီးစ်ဘုရင်၏ ဖခင်။

၃၄။ တမ္မိ့စ် - ကြေးအသုံးအဆောင်များ သွန်းလုပ်ရန်အတွက် ကြေးသတ္တုတွင်းထွက်များ ရောင်းချရာတွင် နာမည်ကြီးသောဒေသ။ ကဗျာဆရာ အိုဗစ်၏ "အသွင်ပြောင်းလဲခြင်း" လင်္ကာတွင်လည်း ထည့်သွင်းဖော်ပြထားပြီး အီတလီတောင်ပိုင်းဟု အကြမ်းဖြင်း မှတ်ယူရသည်။

၃၅။ နိုင်ယွန်တောင်- အစ်သက္ကပြည်၏ ထင်ရှားသော နိုင်ယွန် (သို့) နရစ်သွန်တောင်။

၃၆။ ရစ်သရွန် - အစ်သက္ကပြည်၏ သင်္ဘောဆိပ်။

၃၇။ လေအာတီးစ် - အိုဒစ်စီးယပ်စ်၏ ဖခင်။

၃၈။ဟားပီးစ် - အတောင်ပံပါရှိ၍ အစာကို ခြေဖြင့် သုတ်ယူကာ သတ်ဖြတ်စားသောက်တတ်သော သတ္တဝါ။

၃၉။ဒူလီခီယမ် - အစ်သက္ကတိုင်းပြည်တွင်းရှိ ကျွန်းဒေသတစ်ခု။

၄၀။‌ ဆေမီ - မင်းသားများ အုပ်စိုးသည့် အစ်သက္ကတိုင်းပြည်တွင်းရှိ ကျွန်း ဒေသတစ်ခု။